Ymunodd Azamat Astakhov ag Addysg Oedolion Cymru (AOC), yn Abertawe, ym mis Ionawr 2024 fel Dysgwr Lefel Mynediad 3 Rhan-amser. Gwnaeth gwblhau a phasio ei dystysgrifau Lefel 1 Llawn Amser City and Guilds ym mis Mehefin 2025 – cyflawniad anhygoel mewn cyfnod mor fyr. Yn sicr, cofleidiodd ei astudiaethau gydag AOC, ac mae ei gyflawniadau yn ganlyniad i waith caled ac ymrwymiad.

Cysylltodd Azamat yn ddiweddar i esbonio byddai’n rhaid iddo roi’r gorau i’r dosbarthiadau Lefel 2 Rhan-amser gan ei fod llwyddo wrth chwilio am swydd, a bydd yn dechrau gweithio’n llawn amser i Gyngor Abertawe.

Dyma beth ysgrifennwyd ganddo:

“Bu fy nghyrsiau Saesneg gyda AOC yn gymaint o gymorth i mi wrth chwilio am swydd, diolch i’r sgiliau ymarferol a gefais. Aethom drwy bynciau penodol fel sut i ddisgrifio fy sgiliau a fy ngalluoedd, sut i ysgrifennu negeseuon e-bost at gyflogwyr, a sut i gynnal sgwrs. Dysgom hefyd y gwahaniaeth rhwng iaith ffurfiol ac anffurfiol. Diolch i’r cwrs, datblygodd fy sgiliau Saesneg yn fwy bywiog a naturiol. Roedd hyn yn gymorth i mi ysgrifennu llythyr cais da a deall sut i gyfathrebu’n iawn gyda darpar gyflogwyr. Rhoddodd y paratoad hwn sylfaen gadarn i mi a gwnaeth i mi deimlo’n fwy hyderus o’r dechrau.”

“Roedd yr hyder hwn yn ddefnyddiol iawn yn ystod y cyfweliadau. Cefais tua deg ohonynt, a phob tro roeddwn yn teimlo’n fwy sicr ohonof fy hun. Defnyddiais y sgiliau or gwersi yn weithredol: ceisiais siarad mewn trefn resymegol, cysylltu fy syniadau’n llyfn, a defnyddio ymadroddion mwy cymhleth i swnio’n glir ac yn naturiol. Parhaodd fy rhuglder Saesneg i wella, ac yn y diwedd, rwy’n sicr mai dyna fu’n gymorth i gael swydd yn y diwedd. Diolch yn fawr i Nia, Sandra, a holl staff AOC!’

Sylw Nia amdan Azamat:

“Rydym yn hynod o falch ohonot Azamat, ac yn gwybod y byddwch yn ased i Dîm Gweithiol Sbwriel/Ailgylchu, Adran Gwastraff Cyngor y Ddinas. Arddechog, dal ati – mae Azamat hefyd yn dysgu Cymraeg i ychwanegu at ei set sgiliau!”

Dysgwr arall, sydd nid yn unig wedi bod yn llwyddiannus mewn arholiadau ond hefyd wrth chwilio am swydd, yw Kseniia Bratkova. Ymunodd gyda’r dosbarth Lefel 1 yn 2024 gan gwblhau Darllen Lefel 2 ym mis Gorffennaf 2025. Mae hi hefyd yn mynd ati i ddysgu gyda phenderfyniad ac yn ychwanegu geirfa at ei llyfr nodiadau yn gyson!

Ysgrifennodd Kseniia:

“Fy enw i yw Kseniia. Rwy’n dod o Wcráin. Rwyf wedi bod yn byw yn Abertawe ers bron i 3 blynedd. Rwyf eisiau rhannu fy mhrofiad o ddod o hyd i swydd yn Abertawe.”

“Ers i ni ddod i Abertawe ac ymgartrefu, rwyf wedi dysgu llawer. Roedd yn gyfnod anodd a llawn straen. Nid yw’n hawdd deall sut mae unedau ar wahân yn gweithio mewn gwlad dramor. Ond diolch byth, roeddwn yn ffodus i gael fy nerbyn gan goleg AOC ar gyfer dosbarth ESOL. Rwy’n meddwl mai dyna oedd fy nhocyn lwcus ac yn allwedd i ddeall diwylliant gwahanol ar lefel sy’n fy ngalluogi i ddatblygu’n esmwyth a gyda chefnogaeth wych.”

“Yn ddiamau, rwyf wedi cwrdd gyda’r tiwtoriaid gorau a phobl garedig a deallus o wahanol siroedd a chenedligrwydd. Ac wrth gwrs, rwyf wedi meithrin hyder mewn iaith. Rwy’n meddwl mai un o’r tasgau mwyaf heriol i bob ffoadur yw dod o hyd i swydd. Rhaid i mi gyfaddef bod ymdrechion fy athrawon i gyflwyno gramadeg a sgiliau siarad â’r dysgwyr yn enfawr.”

“Mae’r iaith Saesneg yn sail i’ch llwyddiant wrth chwilio am swydd. Cymerodd bron i 3 blynedd i mi ddod o hyd i’m swydd gyntaf yma ac rwy’n hynod falch bod fy nghyfweliad wedi mynd yn dda a fy mod wedi cael cynnig oriau gwaith yn y sector addysg fel cynorthwyydd addysgu. Rwy’n credu’n gryf bod coleg yn arwain y ffordd at integreiddio i gymdeithas a dysgu ieithoedd mor hawdd ag y gall fod.”

Sylw Nia amdan ei dysgwyr:

Diolch i chi eich dau am gymryd yr amser i rannu eich profiadau am y gwersi Saesneg.

Gobeithio, trwy ddarllen ychydig o straeon llwyddiant, y bydd Dysgwyr yn eich plith yn cael eu hysbrydoli a’u hannog i ‘barhau i fynd’ hyd yn oed ar y dyddiau pan fyddwch yn flinedig. Fel dywedaf wrth fy nosbarthiadau, ‘gwthiwch y drws ar agor’, weithiau dyna’r rhan anoddaf. Mae bob amser yn bleser eich gweld chi!

Nia Williams

Tiwtor ESOL, Abertawe.