Wrth i ni ddod ynghyd i ddathlu Diwrnod Athrawon y Byd 2024 ar ddydd Sadwrn 5 Hydref 2024, mae’n bwysig ein bod ni’n cydnabod rôl hanfodol tiwtoriaid o ran llywio addysg oedolion ledled Cymru. Mae tiwtoriaid yn hanfodol i sicrhau bod cyfleoedd dysgu yn hygyrch, yn gynhwysol ac yn drawsnewidiol i bob dysgwr, beth bynnag fo’u hoedran a’u cefndir.

Yn Addysg Oedolion Cymru, byddwn yn cael cyfle i weld cyfraniadau nodedig beunyddiol ein tiwtoriaid yn digwydd yn y fan a’r lle. Yn ogystal ag addysgu sgiliau, maent hefyd yn ysbrydoli hyder, gobaith ac ymdeimlad o berthyn. Mae hyn yn adlewyrchu cyfraniad ehangach tiwtoriaid ym maes addysg oedolion ledled Cymru. Mae eu gwaith yn amgenach na rhedeg cyrsiau – newid bywydau yw hanfod y gwaith hwnnw. Mae ein tiwtoriaid yn addysgu sgiliau hanfodol megis llythrennedd a rhifedd i helpu dysgwyr i ennill y cymwysterau sy’n ofynnol i ganfod cyflogaeth well, ac maent yn rhan anhepgor o’r gwaith o adfywio cymunedau a grymuso unigolion.

Mae tiwtoriaid ledled Cymru wedi cyflawni rôl neilltuol o bwysig yn ystod blynyddoedd diweddar, yn helpu dysgwyr i ymdopi ag adegau heriol megis cyfnodau’r argyfwng costau byw a phandemig Covid-19. Mae tiwtoriaid wedi bod ar gael i ddysgwyr, yn mynd i drafferth fawr i sicrhau eu bod yn diwallu anghenion y dysgwyr hynny – pa un ai a ydynt wedi cynnig hyfforddiant i ddatblygu sgiliau digidol y sawl sy’n ailymuno â’r gweithlu neu wedi darparu cymorth i ddysgwyr sy’n wynebu caledi personol,  Mae eu parodrwydd i addasu a’u hagwedd ofalgar yn nodweddiadol o diwtoriaid sy’n gweithio i Addysg Oedolion Cymru ac i holl ddarparwyr addysg oedolion yng Nghymru.

Yn ogystal ag addysg, bydd ein tiwtoriaid yn meithrin cymunedau hefyd. Trwy redeg cyrsiau mewn mannau cyfarfod lleol a chynnig amserlenni dysgu hyblyg, maent yn sicrhau bod cyfleoedd dysgu yn hygyrch i’r sawl y mae arnynt angen y cyfleoedd hynny yn fwy na neb – pa un ai a ydynt yn ceisio sicrhau cydbwysedd rhwng eu dyletswyddau gwaith a’u cyfrifoldebau teuluol neu’n wynebu heriau ariannol.  Mae’r math hwn o ymroddiad i ddysgu gydol oes yn sicrhau bod addysg yn arf grymus at ddibenion datblygiad personol a phroffesiynol ledled Cymru.

Rydym hefyd yn cydnabod fod tiwtoriaid ledled y wlad yn cyfrannu profiad a brwdfrydedd helaeth at y gwaith. Mae gan lawer ohonynt ddirnadaeth unigryw o’r heriau y mae eu dysgwyr yn wynebu ac maent yn fedrus o ran eu gallu i greu amgylcheddau cefnogol ac ymatebol sy’n galluogi pobl unigolyn i ffynnu. Mae’r dull hwn yn cyd-fynd â’n hethos sy’n rhoi pwyslais ar addysg sy’n canolbwyntio ar ddysgwyr, a chaiff ei amlygu gan diwtoriaid sy’n gweithio mewn colegau, canolfannau cymunedol a chanolfannau addysg oedolion ledled Cymru.

Rydym ni yn Addysg Oedolion Cymru wedi ymrwymo i fuddsoddi yn ein tiwtoriaid oherwydd mae eu datblygiad proffesiynol yn allweddol i sicrhau y gall ein dysgwyr lwyddo. Mae hyfforddiant rheolaidd yn sicrhau eu bod yn ymwybodol o’r arferion gorau diweddaraf ym maes addysg, ac mae hynny yn ein helpu ni i gynnal safonau uchel o ran addysgu a dysgu. Mae darparwyr addysg oedolion ledled Cymru wedi ymrwymo i’r buddsoddiad hwn, ac maent oll yn cydnabod fod angen cynorthwyo dysgwyr i gyflawni eu cenhadaeth, sef grymuso ac ysgogi dysgwyr.

Heddiw, ar Ddiwrnod Athrawon y Byd, rydym yn dathlu cyfraniadau tiwtoriaid ym mhob rhan o Gymru. Mae eu hymroddiad i’r gwaith o greu cyfleoedd i ddysgwyr sy’n oedolion yn helpu unigolion i gyflawni eu dyheadau, ac mae hefyd yn cryfhau cymunedau ac yn cefnogi datblygiad cymdeithasol ac economaidd Cymru gyfan.

Diolch yn fawr iawn i’r holl diwtoriaid ledled Cymru sy’n ymroi i gyflawni’r gwaith hwn. Teimlir eich dylanwad ymhell tu hwnt i’r ystafell ddosbarth, ac mae eich cyfraniadau yn amhrisiadwy.

Kathryn Robson
Prif Weithredwr, Addysg Oedolion Cymru