Mae’r cwrs hwn yn rhoi’r wybodaeth a’r sgiliau ymarferol sydd eu hangen ar ddysgwyr i ddarparu cymorth cyntaf brys yn y gweithle, gyda’r opsiwn i gwblhau hyfforddiant Cymorth Cyntaf Coedwigaeth (+F) ychwanegol yn ôl yr angen.

Bydd dysgwyr yn ymdrin â rôl a chyfrifoldebau swyddog cymorth cyntaf brys, asesu digwyddiad, rheoli unigolyn anymatebol, adfywio cardiopwlmonaidd (CPR) a defnyddio cyfarpar diffibrilio allanol awtomatig (AED), tagu, ffitiau, sioc, clwyfau a gwaedu, a mân anafiadau.

Bydd dysgwyr sy’n cwblhau’r elfen (+F) ychwanegol yn dilyn dwy awr arall o hyfforddiant cymorth cyntaf sy’n benodol i goedwigaeth. Mae hyn yn canolbwyntio ar anafiadau a chyflyrau meddygol sy’n gysylltiedig ag amgylcheddau coedwigaeth ac amaethyddol, gan gynnwys gwaedu difrifol, anafiadau gwasgu, hypothermia a risgiau eraill sy’n gysylltiedig â gweithio mewn lleoliadau anghysbell ac awyr agored.

Rhaid i ddysgwyr fod wedi cofrestru gyda rhaglen gyfredol Cyswllt Ffermio, gallu defnyddio’r Hwb Sgiliau drwy Fewngofnodi i RPW Ar-lein, a bod wedi cwblhau eu Cynllun Datblygu Personol (CDP).
Rhaid i ddysgwyr gwblhau’r modiwl e-ddysgu gorfodol Iechyd a Diogelwch – Rheoli Risg mewn Coedwigaeth a Ffermio cyn mynychu’r cwrs.
Nid oes angen cymhwyster na phrofiad blaenorol mewn cymorth cyntaf.

Dyfarniad Lefel 3 Qualsafe mewn Cymorth Cyntaf Brys yn y Gwaith (RQF).

Bydd dysgwyr sy’n cwblhau’r elfen ychwanegol (+F) hefyd yn ennill Dyfarniad Lefel 3 Qualsafe mewn Cymorth Cyntaf Coedwigaeth +F (RQF).

Efallai y bydd dysgwyr yn dymuno symud ymlaen i hyfforddiant pellach mewn cymorth cyntaf ac iechyd a diogelwch, gan gynnwys Cymorth Cyntaf Awyr Agored, Cymorth Cyntaf yn y Gwaith, Ymwybyddiaeth o Weithio ar Uchder ac Asesu Risg, Dyfarniad Lefel 2 mewn Iechyd a Diogelwch yn y Gweithle, neu IOSH Gweithio’n Ddiogel.

Gellir dewis hyfforddiant pellach yn ôl rôl y dysgwr, ei amgylchedd gwaith a’i gyfrifoldebau iechyd a diogelwch, yn ôl yr angen.

Dylai dysgwyr wisgo dillad cyfforddus ac ymarferol sy’n addas ar gyfer cymryd rhan mewn arddangosiadau cymorth cyntaf a gweithgareddau ymarferol. Bydd unrhyw ddogfennau adnabod, offer neu ddeunyddiau cwrs penodol sydd eu hangen yn cael eu cadarnhau cyn y cwrs.