Mae’r cwrs hwn yn ymdrin â gweithredu cloddwyr 360° â thrac o dan a thros 10 tunnell yn ddiogel. Bydd y llwybr priodol yn dibynnu ar brofiad a chymhwysedd presennol y dysgwr. Dylai dysgwyr drafod eu profiad a’r math a maint o gloddiwr y mae angen iddynt ei weithredu gyda’r darparwr hyfforddiant cyn cofrestru.

Gweithredwr Profiadol – Prawf/Asesiad – £477.00

Mae’r llwybr hwn wedi’i gynllunio ar gyfer dysgwyr sydd â phrofiad blaenorol o weithredu cloddwyr 360° ac sy’n barod i ddangos eu cymhwysedd drwy asesiad. Bydd dysgwyr yn cael eu hasesu ar feysydd gan gynnwys gwiriadau cyn defnyddio, gweithredu’n ddiogel, symud y peiriant, cloddio a rheoli’r peiriant, diogelwch ar y safle, a chau a diogelu’r peiriant.

Gweithredwr Newydd – Cwrs Hyfforddi – £1,212.00

Mae’r llwybr hwn wedi’i gynllunio ar gyfer dysgwyr sy’n newydd i weithredu cloddwyr 360° neu sydd angen hyfforddiant pellach. Bydd dysgwyr yn datblygu’r wybodaeth a’r sgiliau ymarferol sydd eu hangen i gynnal gwiriadau cyn defnyddio, gweithredu a symud y cloddiwr yn ddiogel, cyflawni tasgau cloddio, deall peryglon ar y safle a pheryglon gweithredol, a chau a diogelu’r peiriant yn gywir wrth baratoi ar gyfer asesiad.

Rhaid i ddysgwyr fod wedi cofrestru gyda rhaglen gyfredol Cyswllt Ffermio, gallu cael mynediad at yr Hwb Sgiliau gan ddefnyddio Mewngofnodi RPW Ar-lein, a bod wedi cwblhau eu Cynllun Datblygu Personol (CDP). Rhaid i ddysgwyr hefyd gwblhau’r modiwl e-ddysgu gorfodol Iechyd a Diogelwch – Rheoli Risg mewn Coedwigaeth a Ffermio. Bydd y llwybr hyfforddi neu asesu priodol yn dibynnu ar brofiad a chymhwysedd presennol y dysgwr. Dylai dysgwyr drafod eu profiad blaenorol o weithredu peiriannau ac a oes angen ardystiad arnynt ar gyfer cloddiwr o dan neu dros 10 tunnell gyda’r darparwr hyfforddiant cyn cofrestru.

Cerdyn Gweithredwr NPORS – Cloddiwr 360°

Bydd y cofrestriad NPORS priodol yn adlewyrchu’r categori o gloddiwr y mae’r dysgwr wedi cwblhau’r hyfforddiant a’r asesiad arno’n llwyddiannus.

Efallai y bydd dysgwyr yn dymuno symud ymlaen i hyfforddiant pellach ar beiriannau ac offer, gan gynnwys categorïau ychwanegol o gloddwyr neu beiriannau amaethyddol eraill sy’n berthnasol i’w gwaith. Gall gweithredwyr profiadol hefyd ymgymryd â hyfforddiant ac asesiadau pellach i ehangu ystod eu cymwyseddau gweithredu cydnabyddedig.

Dylai dysgwyr wisgo dillad addas ac esgidiau diogelwch a dod ag unrhyw gyfarpar diogelu personol (PPE) sydd ei angen ar gyfer yr hyfforddiant ymarferol a’r asesiad. Bydd y darparwr hyfforddiant yn cadarnhau cyn y cwrs unrhyw ofynion penodol o ran dogfennau adnabod, PPE, offer neu ddeunyddiau cwrs.