Mae’r cwrs hwn yn darparu hyfforddiant ac asesiad ar weithredu tryc codi gwrthbwyso yn ddiogel. Gall dysgwyr ddewis y llwybr sydd fwyaf addas i’w profiad a’u cymhwysedd presennol.

Gweithredwr Profiadol – Prawf/Asesiad – 1 diwrnod – £216.00

Mae’r llwybr hwn wedi’i gynllunio ar gyfer gweithredwyr profiadol sydd eisoes â digon o brofiad ymarferol o weithredu tryc codi gwrthbwyso ac sy’n barod i ddangos eu cymhwysedd drwy asesiad. Bydd dysgwyr yn cael eu hasesu ar feysydd gan gynnwys gwiriadau cyn defnyddio, gweithredu a symud yn ddiogel, trin llwythi, stacio a thynnu'r stac i lawr yn ddiogel, ymwybyddiaeth o beryglon, a gweithdrefnau parcio a chau diogel. Gellir argymell hyfforddiant pellach lle bo angen.

Gweithredwr Newydd – Cwrs Hyfforddi Llawn – 5 diwrnod – £936.00

Mae’r llwybr hwn wedi’i gynllunio ar gyfer dysgwyr sy’n newydd i weithredu tryc codi gwrthbwyso neu sydd angen hyfforddiant llawn. Bydd dysgwyr yn datblygu’r wybodaeth a’r sgiliau ymarferol sydd eu hangen i gynnal gwiriadau cyn defnyddio, deall rheolyddion ac egwyddorion gweithredu’r tryc, symud yn ddiogel, asesu a thrin llwythi, stacio a thynnu'r stac i lawr yn ddiogel, adnabod peryglon yn y gweithle, a pharcio a diogelu’r tryc yn gywir wrth baratoi ar gyfer asesiad.

Dylai dysgwyr drafod eu profiad blaenorol o weithredu gyda’r darparwr hyfforddiant cyn cofrestru er mwyn sicrhau bod y llwybr priodol yn cael ei ddewis.

Rhaid i ddysgwyr fod wedi cofrestru gyda rhaglen gyfredol Cyswllt Ffermio, gallu cael mynediad at yr Hwb Sgiliau gan ddefnyddio Mewngofnodi RPW Ar-lein, a bod wedi cwblhau eu Cynllun Datblygu Personol (CDP). Rhaid i ddysgwyr hefyd gwblhau’r modiwl e-ddysgu gorfodol Iechyd a Diogelwch – Rheoli Risg mewn Coedwigaeth a Ffermio. Bydd y llwybr hyfforddi neu asesu priodol yn dibynnu ar brofiad a chymhwysedd presennol y dysgwr. Dylai dysgwyr drafod eu profiad blaenorol o weithredu gyda’r darparwr hyfforddiant cyn cofrestru er mwyn sicrhau bod y llwybr priodol yn cael ei ddewis.

Bydd cwblhau’r hyfforddiant a’r asesiad priodol yn llwyddiannus yn arwain at:

Cerdyn Gweithredwr NPORS – Tryc Codi Gwrthbwyso

Bydd y cofrestriad NPORS priodol yn adlewyrchu’r categori o beiriant y mae’r dysgwr wedi cwblhau’r hyfforddiant a’r asesiad arno’n llwyddiannus.

Efallai y bydd dysgwyr yn dymuno symud ymlaen i hyfforddiant pellach ar beiriannau ac offer, gan gynnwys Tryc Codi Telesgopig ar gyfer Tir Garw, cyrsiau ATV, neu Yrru Tractor a chyrsiau tractor arbenigol cysylltiedig. Gall dysgwyr ddewis hyfforddiant pellach sy’n berthnasol i’r peiriannau a’r gweithgareddau sydd eu hangen ar gyfer eu gwaith.

Dylai dysgwyr wisgo dillad addas ac esgidiau diogelwch a dod ag unrhyw gyfarpar diogelu personol (PPE) sydd ei angen ar gyfer yr hyfforddiant ymarferol a’r asesiad. Bydd unrhyw ddogfennau adnabod, PPE, offer neu ddeunyddiau cwrs penodol sydd eu hangen yn cael eu cadarnhau cyn y cwrs.