Mae’r cwrs deuddydd hwn yn rhoi’r wybodaeth a’r sgiliau ymarferol sydd eu hangen ar ddysgwyr i ddarparu cymorth cyntaf mewn amgylchedd gwaith awyr agored.
Mae’r cwrs yn ymdrin â theori a nodau sylfaenol cymorth cyntaf, cyfrifoldebau swyddog cymorth cyntaf, cynnal arolwg cychwynnol ac asesiad eilaidd, y system resbiradol, dadebru a defnyddio AED, ac anhwylderau anadlu a chylchrediad y gwaed.
Bydd dysgwyr hefyd yn ymdrin â chlwyfau a gwaedu, ffitiau, llosgiadau, gwrthrychau estron, brathiadau a phigiadau, anafiadau i esgyrn, cymalau a chyhyrau, anafiadau i’r pen a’r asgwrn cefn, anafiadau i’r frest a’r abdomen, anafiadau llosgi arbenigol, anafiadau i’r llygaid, gwenwyno, anaffylacsis, salwch difrifol, effeithiau gwres ac oerfel, a sioc drydanol.

Rhaid i ddysgwyr fod wedi cofrestru gyda rhaglen gyfredol Cyswllt Ffermio a chael mynediad i’r Hwb Sgiliau. Rhaid cwblhau Cynllun Datblygu Personol (CDP) i gyd-fynd â’r cais am hyfforddiant.
Cyn gwneud cais am gyllid, rhaid i ddysgwyr hefyd gwblhau’r modiwl e-ddysgu gorfodol Rheoli Risg Iechyd a Diogelwch mewn Coedwigaeth a Ffermio 2026.

Ar ôl cwblhau’r cwrs yn llwyddiannus, bydd dysgwyr yn derbyn tystysgrif a gydnabyddir yn genedlaethol.

Ar ôl cwblhau’r cwrs yn llwyddiannus, efallai y bydd dysgwyr am ddatblygu eu gwybodaeth am gymorth cyntaf ac iechyd a diogelwch ymhellach drwy gyrsiau perthnasol eraill, gan gynnwys Cymorth Cyntaf Brys yn y Gweithle, Cymorth Cyntaf Brys yn y Gweithle (+F), Cymorth Cyntaf yn y Gweithle, Ymwybyddiaeth wrth Weithio’n Uchel ac Asesu’r Risg, Codi a Chario, neu Weithio’n Ddiogel mewn Amaethyddiaeth / Garddwriaeth, yn ôl yr angen.

Nid oes angen unrhyw offer arbenigol. Dylai dysgwyr wisgo dillad cyfforddus sy’n addas ar gyfer cymryd rhan mewn gweithgareddau cymorth cyntaf ymarferol.